2Ti 3 | GbrGAW | STEP | Kwo bmiya lo ha kpe deye n jesun, Timatawus nge dna n na anyipyei kmaknayi, Yesu vi ɓei la dna ɓo.

2 Timothy 3

Wahala Nabye

1 Kwo bmiya lo ha kpe deye n jesun, Timatawus nge dna n na anyipyei kmaknayi, Yesu vi ɓei la dna ɓo. 2 Gama aza ɓei ye ɓahin tukwo n ɓa agyiwyei, ɓa ɓei zhin aɓokwo ɓai gma, ɓai ci Shekwoyi wyegba, to ɓai wo oɓa zakwoyi ɓedan, to ɓai zhin godiyan, aɓi a nukwoyi. 3 Ɓa ɓei kwo atukwo agnana to ɓai wo aza ɓedan, ɓa ɓei ze aza kata, ɓai la wahala kala, ɓai zhin ɓenukwoyi doho-dohoi n tna nubo zhin. Ɓa to ɓei wo ɓon, n tna sun-sun gye, ɓai kpe aza agye n ɓa zhin ɓemana nyi. 4 Ɓa ɓei kun oɓa anugundo, a tukwo gnana-kwoyi n nu-nuyi n na aɓokwoyi, ɓai gna agmada ye ndu Shekwoyi mwa-mwa ga. 5 Ɓa ɓei lo aduwa nyakun, ama ɓato ɓei ga nya ho gaiciya n ɓa wo n ɓon. To ye ɓa dna ho kwocen.

6 Azayi pya nu lo aza puwa ɓai gyi nugundo n na anyikwo tna ceceyi, alaifi yi nu bugba, ɓa wu anyikwozaye oɓa zokwo woi-woyi. 7 Anyikwozaye pya vi a malami a woi-woi, ama ɓata ye ɓa kpe gaiciya ye m. 8 A malami ye pya gni apa-pa n gaiciya yi, shi Yinisu n Yambrisu yi ɓei gni apa-pa n Musa yi nyi. Ɓa n na abugbayi tu cegye, n pmi-pmi yi ya n Yesu viyi gaiciya.

9 Ama ɓa ta si n kpa yin, nwyihoi oɓa kwoce dna ɓei kpe anya ya aza gye vinya, shi Yinusi n Yanbrisu alaifi ɓei kpe anya ya nyi.

10 Ama ho kpelo shi ho kamiwye mito zhin aza yi pya nu m. Ho kpe nya yelo n mi ga gaiciya, n jesun shi mi sase n wu, n nyai n mi ye, Ho kpe mi gaiciya ga ye lo dna n Kristi, shi mi sin wahala n sun. 11 Ho kpelo shi mi sin wahala n sun n tuge mi zhin nabari manayi waʼazi. Ho kpe ɓe ye lo n na ɓei zhin mi esa n mi ɓei lo Antakiya nyi, n Ikoniya yi, n Listra yi, ama Dagayi ɓei lami gni. 12 E, aza n ɓaye ɓa zhin oɓo n kwo da Kristi Yesu, ɓa ɓa sin wahala n aza kun n ɓa wun wo nu nyi. 13 Ɓehinhin, a malami akatayi, n na aza nukwoyi ɓa ɓa gyi abye abye n ɓenukwoyi, ɓai dna aza kwoce n mwa, n ɓahin ce shetan n la ɓa dnakwoce.

14 Ama gyi abye n gaiciya gai, dna n na anya n ria wu ho, Ho kpe lo ɓazhin gaiciya nu, gama ho kpe lo ho ɓa mi ha kpema yi n ya wu ho nyi. 15 Ho kpelo shi, esa n ho ɓei zhin ɓinayi nyi, aɓo ki Shekwoyi ɓeda wu ho, okwonu la ho ce ha gwo Shekwoyi gni-gni dna n gaiciya ga n Kristi Yesu. 16 Rubutu ka vinya littafi gyi-gyi-yi nya Shekwoyi nu ɓei da nwoʼgbei, kwo n na apma yi n yi aba ntu n nya wu ɓo, n kwo zhin gaiciya, ya kpe enya ye n kwo to bmiyan, dna n yi asese, kwo gayi kala ya zhin oɓo n kwo bmiya. 17 Shekwoyi zokwo nu n wa zhin yi shiri zokwo doho-dohoi, ya zhin aza vinya ɓemana.